في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى الاتفاق الروسي – التركي الذي يتعلق بأحداث سوريا.
إقرأ أيضاً: «عقصة» لـ«المجلس النيابي»: إذا شطبتوا من محضر الجلسة فيكم تشطبوا من ذهن الشعب!
وجاء في نص الحلقة:
وأخيرا .. اتفقت جميع الأطراف على وقف اطلاق النار في سوريا .. حلو حلو .. عن جد حلو كتير .. نعم ؟؟؟ شو ؟؟ كيف ؟؟؟ مش كل الأطراف؟؟ العمى .. لكن مين ومين ؟؟ الروس والأتراك ؟؟ بس ؟؟؟
يا أخي اتركني من المعارضة وأنها 100 راس .. ولك ألف راس .. مليون راس .. بس النظام وجماعته .. ياللي قرعوا راسنا أنهن إيد واحدة يا بهجت .. ما دخلوا بالاتفاق؟؟ العمى كنّو صحي ..
العتاااااااااااااااااااااااا .. وعلى شو من مبارح نازلين مواقف وتصريحات .. ولن نقبل .. لن نقبل .. والاتفاق يشمل .. والاتفاق لا يشمل .. اتفاق مين يا بو شملة ؟؟ اتفاق شو ؟؟ أنت شو عرفك بالاتفاق أصلا ؟؟ روح اقعد محلك ما بدي أسمع نفسك .. متل الطبل .. بده يحكي ويلعي .. وهو مش قاريينه أصلا ولا شايفينه ..
طيب .. واللي طارق مشاوير من دول مجاورة ؟؟ شو بده يعمل إيه ؟؟ لوين بده يروح ؟؟ بقيله من جماعته شي 18 واحد .. والباقي رجع بصناديق .. هيدول ال18 .. شو مستقبلهن ؟؟ بيقعدوا من دون شغل ؟؟ كنتوا انتظروا شوي .. ما كان باقي غير عضة كوساية .. طيب عالقليلة اعطوهن شهرين إنذار .. يدبروا حالن الجماعة ..أو اعطوهن تعويضات نهاية الخدمة .. أو صرف من الخدمة .. يا أخي ما بعرف شو بيعملوا … بيفتحوا جبهة جديدة .. بيروحوا على بلد تاني يفظعوا فيه .. ما بعرف ..
أو يا أخو .. يشتغلوا شغلة تانية .. إيه ليش لا ؟؟ أنا بدبرلهن شغل منيح .. هلأ ضاربة المسلسلات الهندية .. والهنود إلهن مراء كتير بالأغاني .. إذا ماتت أمه بيغنيلها إذا طلق مرته بيغنيلها إذا حبيبها أكل أتلة بتغنيله ومجرد ما يخطوا أي غنية هندية، بتلاقي شي 20 واحد ظهروا فجأة يرقصوا .. من وين إجو ؟؟ ربك أعلم .. فمنشغلهن مطرح هيدول اللي بيظهروا فجأة وبيصيروا يرقصوا .. هيك هيك هنة خبرة بالرقص .. بس عالقليلة .. هالمرة .. منكون عارفين من وين إجو .. إجو بعد ما خلصوا رقص على دم الشعب السوري !!
#بلال_مواس
#عقصة_دبور
