في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى المناوشات التي شهدتها جلسة مناقشة البيان الوزاري يوم أمس الثلاثاء 27 كانون الأول.
إقرأ أيضاً: عقصة لـ«الطائرة الروسية»: البحر الأسود ياللي طول عمره أسود .. بيّضها هالمرة !!
يييييييه .. الله يرحمك يا ستي .. مبارح تذكرتك .. لما كانوا بنات العيلة يتخانقوا .. وأنت قاعدة تصرخي عليهن .. بس يا بنات .. هلأ بتكسروا الأساور
تذكرت يا ستي لما كنت بالمدرسة .. ونتخانق بالملعب أو بالصف .. أستاذ .. أخدلي المحاية .. أستاذ قلله يسكت .. أستاذ .. ليك كيف عم يحكي معي
تذكرت لما نلعب بالحارة .. بابا .. هاد فياض أخدلي الطابة .. بابا .. قول لفياض ما يتدخل فينا .. كبرنا شوي بالحارة وصرنا نتخانق .. فياض من ميلة .. وماجد من ميلة .. وأكشن .. أنت اسكت .. لالا .. أنت اللي بتسكت .. هيدي حارتنا .. يالله من هون .. ههههه إيه أنت أصلا غيران مني .. أنا بغار منك ؟؟ إيه طبعا لأنه ما أخدوك معهن عالسيران .. إيه اسكووووووووت .. أنت بتدحش حالك بكل المشاوير .. سكر تمك .. واحد متلك بيسكر تمه .. كول خرما .. اشرب خرنوب .. كول كريما .. اشرب كاكاو ..
كبرنا يا ستي .. وكبروا اللي حوالينا .. وصاروا نواب .. بمجلس نيابي .. محترم موقر .. وبعده النقار والنقير بيناتهن .. بقيوا ماجد وفياض .. عم يتخانقوا .. والأستاذ بيناتن عم يحاول يهدي الوضع .. بس هيدا الأستاذ غير أستاذ المدرسة .. ما فيه يقلهن اطلعوا لبرا .. ولا في يقلهن بوكرا ما بتفوتوا بلا أهاليكن .. ولا بيقدر يعمل معهن شي .. غير جملة .. تشطب هذه العبارة من محضر الجلسة .. بس قولك يا ستي .. رح تنشطب هيدي العبارة من أذهان الشعب ياللي عم يشوف هيك نواب ويتحسر على اختياراته ؟؟
#بلال_مواس
#عقصة_دبور
