في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى جرائم القتل التي تشهدها الساحة اللبنانية بوتيرة متصاعدة ولأسباب أقلّ ما توصف تافهة!
إقرأ أيضاً: «عقصة» لـ «الإعلام»: ممكن تعملوا السبعة ودمتها .. تحت إسم «السكوب»!!
وجاء في نص الحلقة:
“سؤال بيراود أي حد بلبنان وبيطرح نفسه بقوة .. شو هو أرخص شي بهالبلد ؟؟ والجواب أرخص شي بهالبلد .. هو الإنسان .. إيه نعم .. الإنسان والنفس البشرية .. ورح نستعرض بهالحلقة أهم 5 أسباب للقتل بلبنان:
السبب الأول .. الكوسا .. إيه نعم .. الكوسا .. وبالتفاصيل .. أنه أثناء وجود الضحية في سهل الفرزل قرب أرض بيعمل فيها القاتل وبيقطف كوسا من أرض متداخلة مع أرض الضحية .. صار تلاسن بيناتهن .. تطور وصار تضارب .. وهون راح القاتل عالسيارة جاب مسدسه وقتل الضحية بسبع رصاصات كرمال شوية كوسا
السبب التاني .. الكلب .. إيه إيه .. الكلب هيدا اللي بيعوي .. ومن تعوايته انزعج القاتل وصار تلاسن مع عيلة بأكملها مؤلفة من ثلاث أشخاص .. بمنطقة عشقوت .. فطلع خلق القاتل .. وطلع معه مسدسه .. وقتل العيلة كلها المؤلفة من ثلاث أشخاص .. وزاد عليهن أحد المارين بالمكان .. فصاروا أربعة
السبب التالت .. أفضلية مرور .. لكن .. نحن اللبنانيين راسنا ما بيحملنا .. متل ما صار مع قاتل .. لما زاحمه الضحية بالمرور وما خلاه يكمل أو يدوبل عنه .. وهالشي خلا جنون القاتل يطلع .. وضل لاحق المجني عليه كل الطريق لحتى حشره بمكان ..ونزل ليه .. وبالسكاكين ضل يطعن فيه لحتى فارق الحياة .. والمفارقة هون أنه الشعب النضة كله كان واقف عم يتفرج .. لاء وعم يصور كمان
السبب الرابع .. تصليح الدراجات النارية .. يعني الموتسيكلات .. وبالفعل كانت موت من دون سيكلات .. حيث قام الجاني بإطلاق نار من بندقية صيد على الضحية بعد ما اصطحبه من بيته لإصلاح الدراجة النارية .. وبعدين صارتلاسن بيناتهن أدى إلى تضارب بالأيدي وبعدين للقتل
السبب الخامس .. نيسكافيه .. نيسكافيه ما غيره .. أبو رغوة ده .. والقصة أنه الجاني طلب نيسكافيه .. ما عجبه .. نزل من سيارته وأطلق النار على الضحية اللي عم يسترزق .. وصودف وجود زبون عم يشرب قهوة كمان .. فكمان أكل نصيبه من الرصاصات .. مما أدى لمقتلهن على الفور
وهيك أعزائي المستمعين .. كنا مع توب فايف .. لأهم أسباب القتل بلبنان .. الله يستر وما شي يوم .. ينزاد عليهن .. سب سادس . ويقولوا .. انقتل بسبب عقصة دبور !!
#بلال_مواس
#عقصة_دبور“.
إقرأ أيضاً: بالصور: طلب منهما كوب «نسكافيه».. ومن ثمّ قتلهما في قب الياس!
