في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى تعاطي الإعلام مع حادثة الاعتداء الإرهابي على ملهى ليلي في اسطنبول.
إقرأ أيضاً: «عقصة» لـ«حزب الله» بعد اتفاق موسكو وأنقرة: بيروحوا على بلد تاني يفظعوا فيه
وجاء في نص الحلقة:
“فرق شاسع .. شاسع كتير هاه .. بين شغل الاعلام .. وشغل الفضايح .. بين شغل الخبر .. وشغل القرف .. فرق شاسع .. بين إنك تجيب خبر وتنقللي ياه بحدود لزوم معرفتي إله .. وبين إنك تفتش كيف بدك تنقللي الخبر مع صدمة كبيرة .. مع شي .. يخليني أترك كل المحطات وتابع محطتك إلك
الحادث اللي بصار بتركيا .. اختلفوا كتير اللي مع واللي ضد .. واللي طبعا بدي أستغل هالمناسبة لأرجع وأكد إني ضد هالعمل بكل المقاييس.
ولكن مش هاد موضوعي اليوم .. اليوم بدي أحكي مع جماعة السكوبات .. جماعة .. تلفزيوني أقوى من تلفزيونك .. أنا رح صور أم أحد القتلى .. فور تلقيها الخبر .. وتعوا يا مشاهدين .. تعوا شوفوا اللحظات الأولى .. لتلقي الأمهات الخبر .. لالالالا .. أنت فاشل .. أنا رح أعمل سكوب أحلى .. وروح صور الأهالي المفجوعين .. كيف عم يركضوا على مكاتب الطيران لياخدوا البطاقات مجاناً .. إيه نعم مجاناً .. أنت وياه فاشلين .. أنا رح غير الموضوع .. أنا رح روح صور تفجير .. وجبلكن صور راس .. مع شي إجرتين .. وتشكيلة أجزاء جسدية متناثرة
ولك خلصنا بقا ولو .. خلصنا .. ارتقوا شوي .. الحضيض ما عاد يساع وساخة بإسم الإعلام .. تضرب منك لسكوبك إذا بده يخليني استغل أوجاع ومصايب الناس حتى جيب شوية مشاهدة أكتر .. كل تلفزيون .. بيستعمل هيدي الطريقة ليجيب سكوب .. بيصير إسمه تيلي سكوب .. والتيلي سكوب .. رح يخلينا نشوف وبوضوح .. كيف أنكن بلا ضمير وبلا أخلاق مهنية .. وممكن تعملوا السبعة ودمتها .. تحت إسم “السكوب” !!
#بلال_مواس
#عقصة_دبور”.
