24 قضيه (بالقليلي، وفي غيرهن كتير) بيمنعو الثوره تموت وبيأكدو انتصارها!
- لأنو أهل السلطه فجرو بيروت وقتلو أهلها. وراح حوالى 220 ضحية و6.000 جريح و300.000 متضرر! وعم يجربو يضيعو العدالة ويخفو الحقيقة ويغتالو القضاء كل يوم. هيدي القضيه لحالها بتكفي!!
- ولأنو في ناس ماتت كرمال منقوشة والف ليرة. ولانو في أطفال ماتو وعم يموتو لانو أهلن ما معن حق دوا … و لانو قبلهم جورج زريق حرق حالو لانو ما قدر يدفع قسط مدرسة بنتو بالكورة. ولانو كل مواطن صار يا مقهور يا موجوع، يا ضارب عيلتو الجوع. والآتي أعظم!!!!!
- لأنو فلسو الناس، وخلوهن يشحدو مصرياتهن بالبنوكي!!! من وين بدن بهالسلطه يجيبو مليارات حتى يدفعو معاشات الموظفين بالاشهر الجايي؟ والمعاش قدرتو الشرائيه صارت قريبي من الصفر! الوعود الكاذبه والمفاوضات الكاذبه مع صندوق النقد إبرة مورفين! هيدا اذا نجحت! ما هني كذابين. ومش قادرين يلتزمو بأي تعهد إصلاحي. متل العاده!
- لأنو دولة المحاصصة الطائفية مكملة، متل طريقة التكليف والتأليف!!!! يعني مطولين بمكتسبات الطوائف والمذاهب والمتاجره باسم الدين، والخطوط الحمرا الطائفية والمذهبية.
- لأنو الفساد مكمل، والفاسدين يللي هني بالآلاف وبأعلى مراكز السلطة مش عم يتوقفو. والمحميات المالية و 94 مؤسسة عامة بلا رقابة مالية هني منجم بدو يضل يدر ذهب لأحزاب السلطة ومتعهديهم. ولأنو ولا فاسد توقف ولا رح يتوقف!
- لأنو انسرق 86% من ودائع اللبنانيين من البنوكي. ومش بس ما بلش استرداد الأموال المنهوبة ويللي عم ينقال انهن حوالى 320 مليار دولار، ولكن لانو كمان النهب بعدو ماشي.
- لأنو لا ثقة بأهل السلطة! ولانو كلن يعني كلن شاركو بالسلطة بال 40 سنة الماضية، والنتيجة كانت فشل على فشل، وبعد بدن فرص جديدة… وبدن يانا نوثق فيهن! ليش؟ حتى يضلن عم يسرقونا؟! ما اذا فات مصاري جديدي رح يسرقوها ويحولوها على حساباتن برات لبنان!
- لأنو الدولة هي عم تقطع الطرق كل السنة وعلى مدى 30 سنة. وين؟ بوسط بيروت وبالمربعات الامنية وقدام بيوت النواب والوزرا والسفارات وبس تقطع المواكب، وبس تفيض المجارير وبس تسكر القساطر… بكلفة 60 مليار دولار بآخر 30 سنة علينا (2 مليار دولار كلفتها بالسنة) وبيتهمونا نحنا بقطع الطرق لانو قطعنا قسم منها كم يوم!
- لأنو ما في كهربا دوله، ولا في كهربا اشتراك. ونحن متل كل الناس ما عاد فينا نتحمل الشوب بالصيف. وبكرا ما فينا ندفي بيوتنا بالشتي. وعم نطلع على الطوابق العالية مع مشاكل القلب والتنفس على الدرج.
- و لأنو عم تخسرنا الكهربا مليارين دولار سنويا، وصرنا خسرانين شي 45 مليار دولار تقريبا لهلاء. مع انو فينا نجيب الكهربا 24 على 24… دغري خلال كم يوم… ومن دون ولا دولار كلفة (صرت حاكي عن الخطة عدة مرات على التلفزيونات).
- لأنو الناس بعدها عم تشتري ماي للشرب وماي للغسيل تحت الشتي!! والماي رايحة عالبحر وعم تتبخر… ولانو في سدود مش عم تشتغل ومش منيحة متل بريصا، أو ملوثة متل القرعون أو منهوبة متل بسري… والربح الفائت لعدم استثمار المياه هو حوالى 4 مليار دولار كل سنة… يعني مروحين علينا كتير!
- لانو أزمة النفايات باقيي ومطولي. والنهب فيها مستمر بميات ملايين الدولارات. والأزمة معروفة وحكينا فيها وبحلولها كتير، وبينها 8 مطامر عملاقه على البحر… والزبالة تبعنا عندها خيارين بس: يا بتروح عالبحر يا بترجع على الشوارع. وهيك صار بحرنا وشواطينا مكبات زباله.
- لانو الكوارث البيئية مكملة من غياب الصرف الصحي وغيرو. والمجارير بتصب بالشارع والبحر وبالانهر… و لانو في محلات في محطات وما في شبكات، ومطارح في شبكات وما في محطات… والهدر بميات ملايين الدولارات رغم كلفة 1.4 مليار دولار منشآت!
- لانو كل شي كان وباقي ملوث: الهوا، الماي، الزرع، الاكل، النهر، البحر… الليطاني والقرعون…
- لانو الكسارات عم تاكل جبالنا. وفي 5-6 مليارات تهرب ضريبي فيها. وفي حوالى 55 مليار خسارة دولار كلفة تشويه جبال…
- لانو بدل ما نعمل لبنان اخضر، الحرايق عم تاكل جبالنا وخضارنا. واحترق بيوم واحد اكتر ما زرعنا ب 15 سنة… وطيارات الحرايق صارت خرضة… والحرايق عقبال كل سنة!!!
- لأنو ما في دوا. ولأنو النظام الاستشفائي منهار. وفي كتار من الجسم الطبي عم يهاجرو. ولانو في آلاف الناس عم تموت سنويا بالسرطان بلبنان بسبب التلوثات المختلفة. ونسبة السرطان بلبنان أعلى بكتير من اكتر دولة عربية!!!
- لانو في مئات الناس عم تموت على الطرقات بسبب سوء الطرقات وسوء الانارة والجور العملاقه يللي عم تكسر السيارات…
- لأنو النظام التربوي عم ينهار. وقدرة الاساتذة على التحمل عم تنهار. ولانو قسوطة المدارس والجامعات ما بقى تنحمل… وكرمال شو؟
- لانو كل شب هوي مشروع مهاجر لانو ما في شغل والبطالة آكلي كل شي… مع انو عنا إمكانية شغل وعنا خطط فيها تشغل آلاف من الناس. والدولة متل العادة ما بتسمع…
- لانو المرأة اللبنانية مش واصلها حقوقها، لا مساواة في السياسة ولا في المؤسسات، ولا جنسية لولادها من بي غير لبناني…
- لانو لا الطفل ولا المعاق ولا الفقير ولا الختيار ولا المسجون ولا المهمش إلو أيا اهتمام، او استشفاء، او ضمان صحي او ضمان شيخوخة…
- لانو ما فينا نكمل بلا كرامة، وبلا حلم، وببلد من العالم التالت… ولانو صار الوقت يبطل عنا فقرا. وصار الوقت نطلع على المواطنة والمساواة والعدالة الاجتماعية…
- – لأنو طوابير الذل والقهر والبهدله بكل شي ما ممكن ننساها…
- لأنو في سلاح خارج الدولة والجيش. وعم يمنع قيام الدولة.
- لأنو القضاء كان وبعدو مسيس! ومش عم يسمحو للقضاء يستقل. ودايما بيشتغلو على ترويضو بالاستزلام أو بالقوه. وبيبقى في كتير قضاة عندن كرامه وما بيمشو معهن. بس العداله مفقودي!
نحنا منعرف نحل كتير من المشاكل الوطنية والحلول والخطط جاهزة، ومش صحيح منعترض حتى نعترض. وطرحنا كتير هالخطط على المسؤولين وما كانو يسمعو… يعني “فاوضناهن” لسنين طويلة من دون اي تجاوب!!
إقرأ ايضاً: من العراق إلى لبنان..هل تصلح الإنتخابات ما أفسدته إيران ؟!
منشان هيك منقول اليوم التفاوض مع السلطه ما إلو معنى! عطيناهن فرص كتير بالسابق، يعني الفرص اليوم ما بقى إلها معنى! اليوم مطلوب تغيير الطبقة السياسيه كلها. نعم كلها! لأنو الموجودين مكملين بذات الطريقه يللي وصلتنا عا جهنم! ضروري ولازم تغييرهن حتى يصير في تغيير بالاداء. ووقت يللي منطالب بحكومة مستقلة مش لانو مش معترفين انو هني عندهن تمثيل شعبي، لكن هوي لانو الثورة صار عندها تمثيل شعبي رافض للواقع، ولأنو صار لازم يصير فيه معارضة وموالاة وتوقف حكومات الوفاق او النفاق الوطني ونروح على ديمقراطية حقيقية. هيدي الطبقه السياسيه ما فيها تكون الحل!
كرمال كل هالاشيا وكرمال عشرات الاشيا التانيي نحن مكملين بالثورة ورح نضل ننزل عالأرض.
