هذا ما حققته الثورة؟

قبضة الثورة

هالمرة، مش رح احكي عن السياسة. رح احكي عن الجانب الشخصي وبس! انا تعرفت بالثورة خلال شوية أيام على ناس رائعين ما كان ممكن التقيهن برات الثورة وصارو اصدقائي، وخلال ايام قليله صرت اعرف واوثق اني فيني أسند عليهن، ناس ملياني محبة ووطنية وتصميم، وإيمان انو بدن يعملو لبنان احسن واحلى. ناس نوعيتهن ممتازة من كل الطبقات الشعبية والمناطق. والنور يللي طالع منهن جايي من نفق المستقبل المظلم! ناس استرجعت الحرية اللي كانت مأخودة رهينة. ناس عطيت بسبعين يوم صورة عز وكرامة. اكتشفت اديش الثورة غنية بكل واحد من ثوارها، يللي عمل هالمشاهد الحلوي بالساحات وعلى الطرقات بالمشاركة مع التانيين، يللي ما بيعرفهن. وشفت اديش في غنى بقلوب هالناس يللي جيوبها فاضية!

إقرأ أيضاً: الإنتفاضة حامية الوحدة الوطنية.. شارعها

اذا كان في عندي حزن، هوي مش لانو ممكن نفشل بمعركتنا الثورية، وهيدا صار ورانا، لانو الثورة ربحت، والتغيير بدو يتحقق شوي شوي، لانو رغم كل الصعوبات، الذهنيات بلشت تتغير!ولكن الحزن الممكن هو لانو الشك بقلوب الناس يللي ضد الثورة (وبيناتهن المندسين والمخربين) رح يمنعهن من أنهن يكونو جزء من هالتجربة الانسانية الرائعة، مع ناس حلوي، عندها إيمان بالعلم اللبناني وحدو. مش معقول أديش في نساء وصبايا عندهن حلا وشجاعة مش طبيعية بيطلعو بعيون الخوف وبيطحشو! هالنساء رح ياخدو غصب عن يللي ما بدو حقهن بقوانين تنصفهن. ما بقى يقدر المستقبل ما يكون إلهن!

واديش في ناس من مناطق كانت إلنا بعيدي خلتنا نشعر بالفخر لانو الحرب والسنين الماضية ظلموهن، متل طرابلس وكفررمان وصور والنبطية وبعلبك والهرمل وتعلبايا وسعدنايل… أو  حتى ضيع عكار وعاليه… وفرجت الكل انو فيها بمعجن الوجع والقهر تخبز فرح وعنفوان.

اقرأ أيضاً: اضطراب وجوديّ… شعب بلا دولة ووطن

اكيد انا وكتير ناس ارتكبنا أخطاء بهالثورة، بس مش كبيري، باستثناء حادث مؤلم ومش مقصود، تركت فيه الناس روحها فدى للباقيين! وكمان طبيعي بالثورة في ناس حابي تتسلى، وفي ناس ما عندها خبرة، وفي ناس “بتخبص”، وفي ناس بتحب تخون الكل… بس هيدا لانو العدد كبير!

بعيد ميلاد يسوع، كل واحد من شعب الثورة هوي هدية للوطن. وإذا وقفت الثورة هون ما حدا بيقدر يقشطني الكنز يللي لقيتو بهالناس. أنا مع هالناس الجداد بحياتي، ربحت بالثورة، وما بقى أقدر أخسر…!  إنتو شو؟

ينعاد عليكم وعلى عيلكم بالصحة وبالسلام

السابق
«حزب الله» يتحدث عن فرصة للإنقاذ.. ويفجّر فضيحة مصرفية!
التالي
لمناسبة مرور نصف قرن على تأسيس المجلس الإسلامي الشيعي.. دعوة من الشيخ العاملي