في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى موضوع حماة الديار وانتقادهم كتنظيم ينطوي تحت بند الدويلة.
إقرأ أيضاً: «حماة الديار» لبنانية: مليشيات جديدة.. للجيش؟
وجاء في الحلقة:
“حماة الديار .. يا سلام .. ناقصنا لأنه نحن .. منخلص من قوات الردع العربية .. بيطلعلنا حماة الديار .. قال شو ؟؟ مؤسسة رديفة للدولة .. يعني جيش تاني .. وقوى أمن تاني .. وملا إسم .. مين الحماة اللي بدهن يحموا ؟؟؟ وأي ديار بدهن يحموها ؟؟؟
والله عجبتني الفكرة طالما مين ما كان قادر يعمل أي شي .. خليني أستغل الوضع .. وأعمل فرقة جديدة سميها طلائع البعث .. حلو الاسم .. أحلى من حماة الديار
بعدين ليش هي وقفت عالديار ؟؟ بوكرا بيطلعلك حماة الأنوار، وحماة السفير وحماة النهار وحماة الأخبار .. وحماة كل شي في جرايد عنا بهالبلد ..
بعدين أنتو بأي حق بتعملوا حواجز ؟؟ بأي حق بتحملوا سلاح ؟؟ بأي حق بتتدربوا ؟؟ بأي حق بتاخدوا هويات الناس ؟؟ وليش الهوية ؟؟ شو بدك منها ؟؟ كيف بدك تعرف إذا هالشخص مطلوب أو لا ؟؟ بعدين ليك ؟؟ المطلوبين للدولة غير المطلوبين إلكن ؟؟؟ يعني ما عم أقدر روكّز بهالموضوع … عاملي دمار شامل ..
بدك تساعد الدولة .. روحوا انتسبوا للمؤسسات الأمنية بدل ما تفتحوا مؤسسة جديدة طالعة منها ريحة الطائفية وآثار السياسة .. روحوا اقنعوا حلفاؤكن أنهن يكونوا تحت سلطة الدولة .. وما يكونوا دويلة بقلب الدولة ..
حماة الديار .. هي خطوة جديدة لزيادة عدد الدويلات داخل هالدولة .. حماة الديار .. هي بالحقيقة مش حماة الديار .. هي خراب الديار .. دمار الديار .. تقسيم الديار .. تشبيح الديار .. بس لسا ناقص .. نأنشد ونغني كلنا سوا لنقول .. حماة الديار عليكم سلام !!
#عقصة_دبور”.
