نفسي صدقك استاذ غازي وما بدي شكك بإنك مديون .. بس قديش مديون مثلاً ؟؟
انو مش قادر تدخل ابنك مدرسة محترمة ؟
مش قادر تدفع اجار بيتك ؟ ايه ايه اجار ؟ أو عندك شقة مثلاً ؟ متل زملاء بكتلتك صار عندهم شقق بملايين الدولارات ؟ وفيلات وقصور بالضيع الضيع ما غيرها اللي الشباب استشهدت حتى تحررها ؟
هيدول اصحاب المعالي والسعادة متلك مش ولاد “أغنياء” ولا نزلت عليهم “الثروات” بليلة القدر ..
بس انو كيف يعني معليش فهمني كيف بكون نائب مديون بنفس الكتلة ونائب “مريش” اشرحلي بعد اذنك ..
وبخصوص الرعية .. واصحاب القضية يللي عم تصرفو عليهم .. انو مثلاً عملتولهم مصانع ؟ أو جبتولهم الكهربا ؟؟ شو قدمتولهم خدمات يعني يا ريت تشرحلنا ؟؟ طرقات بلا انارة ؟ قساطل مي ما بتوصل فيها المي الا بالمناسبات ؟ عواميد على مد عينك والنظر مشتاقة اكتر من المواطن للسعة تيار ؟ مدارس .. وما اكترها .. مدارس بكل القرى … بلا اساتذة وصفوف مسكرة ؟ لأنو الاستاذ مضطر يشتغل ببيروت حتى يقدر يعيش براتب التعليم والتاكسي والتعليم الاضافي ؟
شو عملتو لهم ؟ منتجعات سياحية ما بيقدر يفوت عليها الا مرة بالشهر أو ولا مرة بالشهر ؟
إستاذ غازي بما انك انسان نظيف وما بتسرق وما عندي شك .. يا ريت تستلف من رفيقك الميسور وما تسلفنا همك .. لإنو وحياتك استاذ ومعزتك عنا ما عاد عنا محل نستلف هموم .. همومنا راكبتنا … وللرِكب .. ويا ريت بتنفك ازمة سعادتك من غير جيبة دولتنا لأن بعد في عنا أمل .. إنو يوماً ما .. إذا مش هلق بكره أكيد .. وبكره باللبناني كمان بيعني يوماً ما .. عنا أمل .. بإلله .. انو هالدولة تصرفهم على الناس .. المحرومين .. المحتاجين .. المعوزين .. المشحرين المعترين ..
إيه في أمل .. والله كبير .. بعد ما تسد هالدولة 60 مليار دولار دين .. بركي بتسدلنا نيعنا بشي “لقمة” من دون تيفا (TVA) .. وتفآ .. على هالعيشة ..
