بحبك يا زعيمي بس قد ولادي…لا

انا بحب زعيمي كتير وانا بإرادتي جبته يمثلني ما حدا ضربني عإيدي ولا حدا دفعلي مصاري، وزعيمي بحطه عراسي لما يكون حاطتني على راْسه، بدافع عنه للآخر لما يكون عم يدافع عني ويحفظلي حقي، لما يكون أد المسؤولية، لما يعرف يقول لأ مطرح ما لازم يقول لأ ويفرض كلمته وقت الحق. انا بحب زعيمي إيه.. بس ما بحب زعيمي اكتر مني، من عيلتي من وطني من مستقبل اولادي. ما بحب زعيمي لما يفضّل مصلحته عمصلحتي، ما بحب زعيمي لما ما يكون مع الحق، ما بحب كلام زعيمي بحب افعاله، ما نحن اللي منقول ” الحب فعل مش كلام”؟..
زعيمي انا بعدني بحبك ورح ضل حبك، بس انت كمان حبني شوي، فكر فيي شوي، خليني ضل شايفتك كبير واهم رجل بلبنان، ما تخليني أندم انو انتخبتك، خليني ارجع انتخبك، خلي صوتي يكون لإلك يهتف باسمك مش يصير ضدك .
زعيمي انا مني متلك، انت قوي وانا ضعيف، ما عندي سلطة متلك، ما عندي حرية متلك، ما عندي مصاري متلك ، ما في عيش متلك ولا عيش اولادي متل ما عايشين اولادك، وما بدي صير متلك، بس بدي اقل حقوقي ببلدي مش عم اطلب اكتر. بدي عيش بكرامتي، وعلم اولادي يعيشوا بكرامة ببلدن مش ببلد غريبة.
يا زعيمي انا متكل على الله وعليك، ما تخليني قول حسبي الله ونعم الوكيل فيك.

السابق
خطاب نصرالله يتجاهل الغارات الاسرائيلية ويتفاخر بمحور المقاومة!
التالي
جنبلاط وفلسطين في الذكرى الاربعين لاغتيال كمال جنبلاط