في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى تجاهل قناة الـmtv في تقريرها الذي أعدّته عن التفجيرات التي استهدفت لبنان تفجيري التقوى والسلام.
وجاء في الحلقة:
“يوم الجمعة، 23 آب 2013:
المكان الأول .. مسجد التقوى، آخر أوتوستراد طرابلس، قرب ساحة الملولة، الساعة 1:45 عقب صلاة الجمعة
المكان الثاني: جامع السلام، آخر طريق الميناء، بجانب السنترال، الساعة 1:50 بعد صلاة الجمعة
دوى انفجاران إرهابيان حصدا ما لا يقل عن 35 شهيد وأكتر من 500 جريح .. وعمل للمدينة جرح لا زال موجود حتى اليوم، واليوم .. زادت هالجراح جرح، أكيد عم تتساءلوا ليش عم ذكركم بهالتفجيرين وخبركم هيدي المعلومات اليوم ولسا ما صار 23 آب، طبعاً، هالمعلومات مش إلكم .. هالمعلومات خطَي، لمراسل قناة بتقول عن نفسها أنها موضوعية، عم نذكّره فيهم لأنه واضح في تقريره أنه مصاب بالزهايمر، فقلنا بركي مننعشله ذاكرته شوي !!
لما مراسل قناة، يعمل تقرير بكل موضوعية، عن تفجيرات لبنان الارهابية، وبيعددهن بالرقم 16، وما بينسى يذكر من بيناتهن تفجير جبل محسن، بس بتخلص ذاكرته، وبتتلاشى، وبيتغافل عن ذكر تفجيري التقوى والسلام، فهون صار عنا مشكلة .. يعني بعرف أنه هالتقرير لا هيرجّع اللي راحوا، ولا هيداوي ألم أي واحد وجراحه، بس من حقهن كلهن، من حق أرواح الشهدا، من حق دماء الجرحى، من حق كل مين تتضرر أو تأذى، من حق جيران المساجد، من حق طرابلس كلها، أنه الاعلام ينصفهم، وأي إنصاف أكبر وأهم من أنه مجرد بس ينذكر اسم طرابلس، وما يتم إهماله .. لأنه طرابلس .. هي أم الفقير، وأم الغريب، وأم الطيبين، وأم البركة، وأم المدن .. فمش رح يصعب عليها أو تغص أنها تكون .. أم تي في !!”
