حسن خليل يكشف عن «كلمتين بينه وبين بري».. اعتذر ولكن!

انتخابات 2022 نبيه بري

كشف الناشط السياسي والمرشح السابق عن المقعد الشيعي في دائرة صور الزهراني ​حسن خليل​ عن “كلمتين بينيه وبين الرئيس بري”.

وقال في منشور عبر حسابه “فايسبوك” امس الأربعاء: “كل ما طالبت به يا دولة الرئيس، وانا صدقا مصدقك، على انه حان الوقت له، صدقني بعد لم يحن الوقت. على شو العجلة.. يعني من اخرها. بما ان الانتخابات كانت استفتاء، خاصة عليك شخصيا في دائرتك الزهراني، وبعدها صور، والحمدلله كلنا اطمنا ان الناس بتعشقكم، والحزب ما بيرفض لكم طلب، وخطبت باسم الثنائي”.

اضاف: “انا بعتذر كنت انتقدكم ٣٠ سنة. وشو بدكم بالتدقيق الجنائي. ما له طعمة. يعني شو بدو يكشف يعني. يبلطوا البحر. وانسوا تطبيق السرية المصرفية، اوتغيروا سلامة. مش انتو بينطلب منكم شيء. شفنا الاستفتاء. ونحن فعلا خونة، وضد الخط انو اصلا شككنا. انا بعتذر اني اصلا شككت، ورفعت الصوت، وحذرت ونبهت، حول انهيار الدولة. على شو؟ كل شيء بخير”.

وتابع: “والله دولة الرئيس اعني ما اقول، وليس كلام بالعامية “تمريك”. ما تعملوا شيء ولا تطبقوا شيء. اذا بعد ٣٠ سنة والناس بايعتكم هيك. والله لا تعملوا ولا تسووا. مبروك دولة الرئيس. رجاء. ما تتعب حالك ولا نفسك حتى بخطاب وعود. والله مش مضطر. وانشالله بعد ٤ سنين، و٤٠ سنة، وياخذ من عمرنا ويعطيكم، وتجيبوا نفس النواب والوزراء، يطول بعمرهم ايضا”.

وقال: “انا شفت واشهد…وساخبر كل اللي برا شو شفت بعيني. واعترف علنا انني لو كنت اعرف، لما ترشحت حتى رمزيا. والدليل للي مش مصدقني او مفكر انو عم اكتب استهزاء: تفضل شوف كيف تم الخرق بالانتخابات بلبنان وين ما كان، الا عند الشيعة. لا. هيدا مش بس لانو الناخبين اوفياء للسيد، او لانو قال لهم هي ٢٠٠٦ سياسية، او خوفا من شق الصف، وهيدا كله صحيح. بس كمان صدقوني الشغلة اعمق من هيك بكتير. بس حضروا مناسبة اجتماعية بالجنوب، او عملوا جولة بالسيارة، او مشي بكم قرية. او وقفوا امام احد اقلام الاقتراع، بتعرفوا شو عم خبركم. الفرجة غير الحكي”.

اضاف: “بعدين الماكينة. يا جماعة المندوبين بكل غرفة وبالممرات وعلى الدرج وبساحة المدرسة اللي فيها الاقتراع وعلى الطرقات، المندوبين اضعاف المقترعين. هيدا مش دليل تنظيم انتخابات. هيدا دليل تنظيم وتوظيف وترغيب وترهيب لمجتمع ٤٠ سنة. اللي ما بينخرط فيه، بيصير منبوذ ولو ما حدا تعاطى معه لانه في حرية. نعم نعم في حرية وزيادة. وما عجبك انت حر، الله معك وبتصير خائن. مبروك الاستفتاء دولة الرئيس. وعذرا ازعجتك. واتمنى لك وللي استفتوا، وللي هني وعم يقراوا الان، بيفكرونا عم نتفلسف، والله عم احكي جد”.

ولفت الى انه “كمان لكم ولهم كلهم، ولكل هالتنظيم والانتخابات والمقترعين، ايضا اقول: كل دولة قوية ولامركزية وبلدية ووديعة ودولار ولولار وليرة وبيرة ،ونقدي وشيك مصرفي وتعميم جديد، وانتم بخير. انا بوعدكم رح خبر كل اللي بعرفهم برا عن اللي شفتوا جوا، حتى ما يعودوا يبكوا كل ما سمعوا اغنية راجع راجع يتعمر راجع لبنان.
ساقول لهم لبنان معمر وخالص، واحسن من اللي كان.
اللي عايش برا ومستغرب كلامي، تفضل زور لبنان والقرى والبلدات وشوف بعينك”.

اضاف: “الشوف غير الحكي..اليوم او بعد ٤ سنين تفضل شوف بعينك. واذا بدك ما تجي خليك عندك. كم يوم وانا بيجي لعندك واحكيلك. حاحكيلك. وبيخلص العمر وما حيخلص الحكي. وحنسمع اغنية فيروز، احكيلي احكيلي عن بلدي احكيلي.. صدقني الفرجة غير الحكي”.

وختم: “حاحكيلك. قال شو.. طلعنا نحن خونة…عند الجهتين.. حلوة هي؟عند الجماعة لانو فتحنا سيرة الدولة والسرقة. وعند الاخرين لان نحن واجهة او محسوبين على الجماعة. دخلك يا صفية قديش بالشهر نحن اليوم؟ وقديش الساعة؟ طفي الضو يا صفية”.

السابق
اتحاد العائلات البيروتية اول «ضحايا» الإنتخابات.. إستقالات وتقاذف لمسؤوليات!
التالي
الخبز يدخل بورصة السوق السوداء جنوباً.. الربطة بـ٣٠ الف!