لمّا كنت مارس مهنتي كطبيب بلبنان كان معروف عنّي قلّة وصف الأدوية و التشجيع على اتباع تغيير نمط الحياة (lifestyle modification) لكتير من الأمراض متل السكري و الضغط كخطوة أولى قبل البدء بأي دواء، و كذلك الأمر بالنسبة للمضادات الحيوية (antibiotics). طبعاً هالأسلوب بيشجعوا عليه كتير المنظمات الطبية على صعيد العالم.
و طبعا كان مريضي اللبناني الحربوق يفقعني هيديك الضحكة الصفرا و يستعجل بده يفل و هو وفالل بيقول جملته الشهيرة “خدلك هالحكيم الحمار”. بعدين قررت فل من البلد و إجي عيش هون مع الحمير اللي متلي.
المهم، بما إنه ما في دوا للكورونا و كلكن مقتنعين بهالشي، حابب إتحمرن عليكن شوي بكم نصيحة. غير الوقاية من التقاط الفيروس عبر العزل و كل الاحتياطات الأخرى اللي أنا متأكد ما رح تعملوها، لازم تجهز جسمك لأقصى قدر ممكن لحتى بس تلقط الفيروس يقدر جهاز المناعة يقاوم و يصمد لحد ما يقضي عالمرض بنفسه. لذلك، عليكم بشرب عصائر الليمون و الحوامض و الفوّار و الزنجبيل المغلي و اليانسون و القرفة و ورق الغار المغلي و أكل العسل و الثوم و الفليفلة و الفجل و لِبا البقر. و زيد شوي من شرب الماء و اعمل شوية رياضة يومياً لتنشيط الدورة الدموية و نظّم نومتك. خفّف تدخين و أرجيلة و كحول و معلّبات و مواد مصنّعة و دهنيات و مشاكل مع مرتك (أو زوجِك) و ابتعد عن مسببات التوتر (بعرف صعبة). و ما تنسى الاعتدال بالتناول كرمال تحافظ عالسكري و الضغط. و مسألة جدا مهمة، حاول ما تاخد مضادات حيوية (antibiotic) إلّا بحالات الضرورة لأنه بيقضي عجزء من البكتيريا الجيدة بجسمك اللي ممكن تساعدك بالقضاء على الفيروس. و لازم تعرف انه المضاد الحيوي لا ينفع بتاتا مع الفيروس و لا بيحميك و لا بيسرّع بالعلاج نهائياً، فرجاءً ما تاخد حبتين فلاجيل و حبتين للملاريا عصحة السلامة، رح يضروك و يضروا اللي حواليك اللي رح يلقطوا بكتيريا مقاومة منّك.
و كوني بعرف إنك حربوق و فقس و رح تسأل “إنه بالصين و أميركا بعد ما لقوا علاج جايي تتفلسف علينا بالعسل و التوم؟ شو هالحكيم الحمار”، رح جاوبك جوابين سلف. ١- هيدا مش علاج، هيدا تحضير للجسم و تقوية للمناعة لتقدر تقاوم المرض بقوة أكبر و هو أفضل من إنك تقاوم بجسم هزيل و مناعة مهترئة. ٢- بتحب تاخد بالنصيحة أهلا و سهلا، ما بتحب… “ذنبك عجنبك” (كَوني طبيب و لازم حافظ عبريستيجي عبر الكلام الراقي، بس انت بتعرف شو قصدي).
اقرأ أيضاً: مادتان للوقاية من فيروس كورونا موجودتان في كل منزل
