في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى موضوع السرايا والاستعراضات العسكرية من القصير إلى الجاهلية.
وجاء في الحلقة:
“أما شو بلد ؟؟ شو نظام ؟؟ شوعدالة ؟؟ شو سيادة ؟؟ شي بيقشعر البدن .. شي بيوقف الشعر .. الأمن .. مستتب .. العدالة .. عالليبرة .. ما في تمييز ما في استنسابية ما في مكيالين .. إيه والله ما في مكيالين .. يا ريت تعاملنا الدولة بمكيالين .. هيدي الكيل بمكيالين .. كانت من زمان .. هلأ لا .. هلأ إنا حرمنا الكيل ..
هلأ استعراضات عسكرية ورياضية وسياسية وأمنية وحزبية وسلاح .. كله تحت حجة دعم الجيش .. وكله على عين الدولة .. مش رح قول على عيون .. لالالا .. على عين الدولة .. لأنه يبدو أنا ما عندها إلا عين واحدة .. قاتل مجرم متبجح بيطلع عالتلفزيون بصورة ضحية وبطل .. وممنوع على القتيل أنه يحكي .. عروض عسكرية خارج لبنان وداخله، وما بيسترجي حدا يعترض ..
يالله يا أوادم .. يالله يا شبابا .. اللي لسا ما عرض يعرض .. مين لسا ما عمل عرض عسكري؟؟ المدام ورا ؟؟ عرضتي؟؟ أيوا تمام .. أستاذ؟ هونيك ؟؟ عرضت أو بعد ؟؟ كويس .. حج ورا .. عرضت ؟؟ .. لالا اللي حدك .. أيوا حضرتك .. عرضت أو بعد ؟؟ عرضت؟؟ ما عرضت ؟؟ يالله لحق حالك .. الديموازيل اللي لابسة فوشيا ؟؟ عملت عرض عسكري أو بعد ؟؟ ليش بعد ؟؟ ما تخافي من شي .. ما حدا رح يقللك شي .. ليكن الكل عم يعرضوا .. وعم يطلعوا عالتلفزيونات .. كيف؟؟ أيواااااااا .. عفوا .. عفوا .. لالا خلاص بلاها .. بلاها أختي … كنت مفتكرك من جماعة الفرفور .. اللي ذنبن مغفور .. طلعتي من المغضوب عليهم !!
#بلال_مواس
#عقصة_دبور”.
