في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى عنصرية وزير الخارجية جبران باسيل ضدّ السوريين.
وجاء في الحلقة:
“أنو ما بدك تهمد أنت ؟؟ ما بدك تكن ؟؟ يعني شو بدك ؟؟ مش عم أفهم ؟؟ من الآخر .. عطيني ياها من الآخر .. شو بدك ؟؟ مزعوج من السوريين؟؟ بدكن ياهن يتركوا هالبلد؟؟ ما بدك ياهن يشتغلوا مطرح اللبناني؟؟ ليش مين جابهن لهون أصلا ؟؟ ما قول لحلفاءك بالأول يتركولهن بلادهن حتى هنة يتركولنا أرضنا ويرجعوا على بلادهن !!
بركي فكرك أنهن فرحانين كتير يقعدوا برا بلادهن ؟؟ أو مثلا متخيل أنهم بقمة السعادة كل يوم والتاني يسمعوا تصريحاتك الانسانية ؟؟ وينك .. إذا خايف على شغل اللبناني ياخده السوري.. هيدا الخوف دخلك بيشمل دكاترة التيار يللي ركضوا حتى يعالجوا رستم غزالي.؟؟؟ هيدا الخوف هو نفسه يعني هو هو نفس الخوف لما حلفاءك حاصروا مضايا ؟؟ بدي أسألك .. طالما أنت كتير مونّأ وبتقرف من السوريين .. ليش ملزق بنظامهن ومتحالف معه ؟؟ وعم تنسق معهم عالحلوة والمرة ؟؟
كلامك عنصري يا معالي الوزير .. عنصري وريحته الكريهة قويت كتير .. لأنه السوري معاليك ..ياللي بدك تمنعه يركب خيمة هو نفسه اللي فتح أبوابه وبيوته ومحلاته وأرزاقه وأملاكه للبنانيين لما حليفك خرب لبنان .. بلو كنت أعلم .. هيدا السوري إذا أنت بدك تمنعه يعمل خيمة أو يشتغل .. أنا مستعد سكنه ببيتي بدل الخيمة وأعطيه شغلي ووظيفتي إذا لزم الأمر !!”.
