أثارت السيدة مي خريش، نائب رئيس التيار الوطني الحر للشؤون السياسيّة وعضو وأمين سرّ الهيئة الإداريّة في مؤسسة سيزوبيل، بلبلةً عبر مواقع التواصل الإجتماعي بتغريدةٍ إتّهمت فيها المشاهير المشاركين في الإعتصامات بتقاضي الأموال، فكتبت:
“مش صدفة الإتصال بالمشاهير والوجوه المؤثرة وعرض الأموال عليها للمشاركة بالحراك. مش صدفة إنّو الناس يلّي صرلها سنين موجوعة يكون سبب وجعها جبران باسيل. مش صدفة التنظيم الموجود على الأرض علماً إنّو لهلق ما في قيادة للحراك. في ناس موجوعة أكيد وفي ناس مأجورة إحذروها… الحرب الناعمة”.
وتفاعل عددٌ من المشاهير مع هذه التغريدة، فعلّق الإعلامي هشام حداد “صديقتي فينا نعرف أسامي؟ كلّ اللي قالوا إسمي رح ينرفع علين دعاوي، وفي حال عدم نفي صاحب التويت، رح ضمّا للدعوى”.
أمّا الممثل وسام حنا فردّ قائلاً “مش صدفة انو توصل sesobel للمكان لوصلتلو بالفترة الأخيرة لو ما حضرتك ما كنت عضو وأمينة سرّ لهالمكان العظيم. هذه الثورة العظيمة أساسها نساء عم بيناضلوا لهالبلد يللي حضرتك ما بتشبهين. نحنا وج لبنان الحلو ما مننشرى ومننباع متل ما انت معوّدة. بتعرفي يا ريت ما رديت عليكي”.
كما ردّ الاعلامي وسام بريدي على تغريدة خريش بفيديو قال فيه “نحنا ناس بدنا ناكل عنب ما بدنا نقتل الناطور، من أوّل نهار وقبل ما تصير هيدي الثورة عم نتوجّه للناس المسؤولين لأنو منآمن انو لازم يكون في مسؤول ولازم المسؤول يسمع صوت الناس”.
وتابع وسام بريدي “ما بعرف من أي منظور عم تتوجّهي لإلنا انو نحنا مرتزقة ومننشرى ومننباع. الوجع اللي عم نعيشو كلّ يوم وحضرتك كمان عم بتعيشيه وكلّ جمهور الأحزاب عم بيعيشوه، هالوجع مش لأنو في جبران باسيل والرئيس عون ورئيس الحكومة ومجلس النواب، الوجع لأنو نحنا عم نحمل سياسة إقتصاديّة عمرها سنين ولليوم ما عم نقدر نوصل لنتيجة. نزلنا عالطريق لأنو متلنا متل الناس، نحنا من الناس وما بيتصلوا فينا ت نعمل شي، منعرف كتير منيح الوجع اللي عم نعيشو، عيب كل ما حدا عبّر عن وجعو يتخوّن”.
اقرأ أيضاً: راقصة «ساحة الشهداء» تُبرر موقفها بعد طردها من قِبل المحتجين!
