ريّس جبران: يا زلمي شوي شوي .. لوينك شاطح

وكمان منذكّرك .. إنو الفساد ما إلو طايفة .. وإنو السرقة ما إلها مذهب .. وإنو الفشل بإدارة الوزارات ما إلو دين .. وإنو يللي فشلوا بالعمل الحكومي هني من كل الأحزاب والتيارات ..

ومنحب نذكّرك كمان وكمان .. إنو طريقة كلامك كتير مستفزة وما بتوصّل إلا للتوتر والقطبية .. وإنك اذا حرّكت الجمر بتولع بيت الخشب .. وإنّك إذا ركّزت على الهجوم الطائفي مش راح تربح شعبية لأنو الناس مش بوارد تتحارب ولا تتنافس كرمال مقعد وزاري أو نيابي أو قيادي ..

يا ريّس جبران .. عمول معروف شوف شو بدك تعمل للزبالة وللكهربا وللمي وللطرقات وللفساد وللحدود ولرئاسة الجمهورية وللسياحة وللإقتصاد وللنفط .. قبل ما تهتم لتوزيع المناصب والكراسي وتعملها شغلتك وعملتك ..

يا ريّس منذكرك إنو كلامك بيجذب صوبك المتعصبين وبيوجّه عليك المتعصبين من تاني ميل .. وبيوقعك بفخّ كبير وبتجرّ معك ناس ما إلهن علاقة ..

يا ريّس جبران ما تكون مشروع فتنة .. جرّب تقرّب المسافات وتجمع بدل ما ترفع الصوت ببرميل فاضي ..

بتصدّق يا جبران إنو اللبنانية بطّلوا يخافوا من بعضن على الصعيد الشعبي ..؟ وإنّو اللبنانية بيخافوا من الطبقة السياسية يللي تاركة البلد بمهبّ الريح .. ؟ بتصدّق إنو المسيحية والإسلام عايشين بأمان ومزعوجين من جماعة السياسة يللي متعبّشين برقابن ..؟ بتصدّق إنو الناس لما بتجتمع بتحكي عن الزبالة والكهربا والفساد وتوزيع الحصص والهجرة .. وبتحكي عن كل السياسيين بالعاطل ..؟ والناس بتقول عن السياسيين “المودرن” إنن صاروا وقحين لما “بيعملوا غلط” بينما كانوا “يستحوا” لما بيعملوا نفس الشي من زمان ..؟

بتصدّق يا ريّس إنو يللي عمبيزقفولك لهالكلام مش بالضرورة يكونوا محمّسين ..؟

يا زلمي شوي شوي .. لوينك شاطح ..؟ روق ما في شي بيحرز ..

والسلام …!!!