لأجل هشام حداد..

مدري ليش ومين حابب يضره لهالصبي، بعرف هشام شاب مهضوم ولذيذ وذكي، بس يلي صار وعم بصير معه في كتير اشيا ما لمصلحته.

خلينا نحكي برواق، اول شي ما فهمت ليش حط راْسه برأس عادل كرم، عادل كرم نجم كبير وأولا وأخيرا هو ممثل ممتاز مش مقدم برامج بس فات هالمضمار اضافة مش اكتر، عادل كرم ممثل سينمائي خطير وترك عشرات الكاركتيرز عالشاشة مش ممكن حدا يجيبهم وما بينعدوا وهيدا دليل تمثيل قوي.

هيدا عادل يا هشام، عادل مش ستاند اب كوميدي بس ولا مقدم برنامج وطبيعي يكون الو محبين وكارهين بس هوي ممثل وهيدا اهم توصيف الو.

اقرأ أيضاً: هشام حداد يتسبب بمعاقبة مذيعة

تاني شي، حرية النقد والسخرية مرتبط بقناعة يلي عم بقدمها ، كتير بضحك استعمالك لاسم باسم يوسف، يا هشام يا حبيبي، باسم هز سيستم كامل، باسم ضيوفه كانوا من فناني الثورة وما قبل يجامل الكبار، باسم كل المحطات يلي ظهر عليها وجبلها اعلى نسبة مشاهدة تركها لما حاولت تفرض شروطها عليه وقعد بلا شغل. انت موظف، ومش عيب بالعكس العيب أنك تدعي انك حر وانت بالنهاية شخص وظيفته يترجم قناعة وسياسة صاحب محطة تلفزيونية والدليل انك جسدت راس حربة لمنافسة اعلامية بالاسم، الناس ما خصها فيها ولا بتعنيلا ع فكرة، همومها ابعد من حربك الخاصة وحتى حروب المحطات ببعض. ال بي سي بالذات ما قدرت تتحمل سلام الزعتري لانو متفلت وراسو كبير وانا بعرف هالشي ولما عملت تجربتي الوحيدة “الفاشلة يلي ما بحبها” اكتشفنا انو التلفزيونات بتحرق يلي بدها ياه، ما تنسى هالشي واظن انك بموقع بتقدر صار تفرض شروطك وتتحرر اكتر اذا بدك تدعي انك ناقد للسلطة وبظن انها صعبة.

تالت شي

الأرقام مش قوة الك، قوة للمحطة والدعايات، قوتك بتاخدها من الناس والشارع حتى يلي ما بحبك يحترمك على الأقل، حتى يلي ما بحبك كمقدم ساخر يحبك كإنسان، ما فيك ترضي كل الناس بس فيك تفرض احترامك ولغة الأرقام كبها ورا ضهرك.. بدك ارقام؟ تعي نحكي بين ناس المسرح والتلفزيون على المية علة يلي بالمسرح اللبناني.

مع انو شغلنا غير إنتوا وطريقتنا غير بس بعد جورج خباز بلغة الأرقام قدرت أعمل بـ٥ سنين ارقام كبيرة للمسرح اللبناني، عرضت اكتر من ٥٠٠ مرة يعني بمعدل ١٠٠ بالسنة، في ناس كبار بهالمجال ما وصلوا لربع الرقم كل حياتهم! بس اكيد ورغم اكتر من ٥٠ الف بطاقة هالشي ما بوقف عنده وبصير بقول للمسرحيين انو إنتوا مش قدي، بالعكس انا بخجل وبتلبك وبحط راسي بالأرض بس أوقف قدام كميل سلامة وعصام ابو خالد وغبريال يمين و فادي ابو سمرا وطبعا روجيه عساف ورفيق علي احمد وغيرهم من الكبار ويمكن مسرحيتي تكون الاكثر اقبالا اكتر بس هالشي محفز لاتعلم منهم! عيب..

اقرأ أيضاً: «mtv»: هشام حداد ينقصه التهذيب وحداد يرد «لحمي مر»!

ع فكرة نحن اهل مسرح… يعني الناس ما بتكبسنا بالريموت كونترول ، الناس بالشتا بالليل بتضهر وبتضهر عيلتها و بتقطع تذاكر وبتحضرنا ، اول شي منفكر فيه هوي انو نتعب بالقدر يلي يوفي هالشي للناس قبل ما نكبر ع حدا..

ع فكرة ميريام كلينك بتجيب ارقام وما بتعمل واحد بالمية من جهد اي كوميدي او ممثل.

بعرفك ابن بيت وابن شارع بالمعنى الحلو وصاحب نكتة، رجاع عالناس وما تقبل حدا يستعملك يا حب، انت كافحت لتوصل وتذكر تترك بصمة حلوة مع كل الحب وشيلك من لعبة الاهانات لانو السخرية فن مش مسبة.

بكل محبة يا هشام وبتعرف هالشي.

السابق
كيف سيتعامل الحريري مع سورية؟ وماذا يُقلق حزب الله؟
التالي
أنجلينا جولي تستعد لخوض معركة الرئاسة الأميركية عام 2020