في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى أزمة موسم التفاح والتعاطي معها بعنصرية.
إقرأ أيضاً: باسيل: لكل نازح سوري تفاحة في لبنان!
وجاء في الحلقة:
“يا دلي يا دلي يا دلي يا تعتيري .. مشكلة .. مشكلة كبيرة .. ما بعرف كيف لازم أتصرف أو شو بدي أعمل .. يا شماتة كل الدول فينا.
يا جماعة الخير، الموضوع كبير ومهم، أهم من انتخاب رئيس جمهورية، أهم من قانون إنتخابي جديد .. الموضوع يا جماعة خطير، أهم من السلام بالشرق الأوسط .. الموضوع عميق عميق .. أعمق من الدول الخفية، وأعمق من أسرار الانقلابات العسكرية، ولك شو البترولل ؟؟ شو النفط ؟؟ شو الغاز ؟؟ حد هالثروة الكبيرة ؟؟ الموضوع أهم بكتير من مناجم الألماس.
الموضوع مش موضوع موز أو أناناس .. مش خيار أو بندورة .. مش بطيخ أحمر أو أصفر .. الموضوع مش فريز أو يوسف أفندي .. الموضوع مش مانجا أو جوافة .. الموضوع أخطر بكتير .. ولك لاه لاه .. مش انجاص حتى ولا عنب .. عم نقلكم أخطر وأكبر
الموضوع موضوع تفاحات البلد .. تصريف التفاحات .. هلأ قضية التفاحات قضية محقة .. ما اختلفنا .. ومنشعر مع أصحابها .. بس لازم نفكر كيف نصرّف التفاح .. لازم نبدع .. بالحلول .
يعني مثلا مثلا .. ليش ما منزيد على وجبات الميدل إيست تفاح ؟؟ يعني تفاحة لكل مسافر .. أو ليش مثلا ما منوزعهم على المساجين تاعون الأشغال الشاقة ؟؟ ونجبر إدارة السجون تلزم المساجين بأكل خمس تفاحات يومياً .. أو لالالالا .. خلينا نخترع أمثال جديدة تساعد على استهلاك التفاح .. يعني مثلاً .. لتصير سفاح .. عليك بالتفاح .. أو لالا .. شو سفاح هيدي ؟؟ هلأ بيقولوا عنا إرهابيين .. خلاص بلاها .. طيب .. ليش ما منعمم التفاح بدل الطوابع عالمعاملات .. يعني منمرق صندوقة تفاح لكل موظف، ومع كل معاملة ، بيعطي تفاحة للمواطنين .. يا الله .. ما منيحة كمان .. ما هيك ؟؟
خلاص .. أنسب حل .. أظبط حل .. أحلى حل .. أهضم حل .. أذكى حل .. أنه نعطيهن للنازحين .. تحت شعار:
حتى من عنصريتنا ترتاح .. ساعدنا بتصريف التفاح !!
#بلال_مواس
#عقصة_دبور”
