لماذا صار اسمي أم عمر؟

بدي أحكيلكن ليش بنادوني بلبنان ( أم عمر ) مع إنو ما عندي ولد إسمو عمر.

أختي اللي أزغر مني قارئة عزاء بالضيعه …فمرة صادفت عاشورا وكنت أنا ببيت أهلي فقامت طلبت مني اكتبلها كم محاضره عن عاشورا والمحاضرة تعتبر أهم شي بالمجلس لإنو السيرة هي نفسها بتتكرر كل الوقت فأنت بتضطر تعمل تجديد بالمحاضره تفاديا للملل والتكرار …طبعا مجلس العزاء مش كلو بكاء ولطم متل ما الكتار مفكرين …اول شي ببلش بالمحاضره وبعدين سيرة أل البيت وبعدين لطميه وبالختام الدعاء ..
المهم: لمن اختي طلبت مني اكتبلها المحاضرات تمنت علي بما إنو عندي حس ادبي إنو أكتبلها قصة عن أل البيت ضمن المحاضرة لإنو الناس بتحب القصص كتير …قمت أنا قلت إذا بدي اكتبلها قصة عن أل البيت فكل أهل الضيعه حافظين قصصهم بصم فما إلي غير أكتبلها قصص عن عمر بن الخطاب لإني انا جد كتير بحب هالشخصيه وقارية قصة حياتو بالتفصيل ..
اللي ساعدني عاهالشي إنو الإمام علي عليه السلام ملقب بأمير المؤمنين وسيدنا عمر الله يرضى عنو كمان نفس الشي …

إقرأ أيضاً: عاشوراء.. بين التطبير والتطبيق

فكنت اكتب القصة عن أمير المؤمنين وما أذكر إسمو وأختي تقلي: ياعمي أول مره بسمع بهالقصص من وين جايبتيها قوم قلها: الله وكيلك هالقصص صحيحه ميه بالميه أنا قريتها عن امير المؤمنين …
طبعا انا كنت اكتبلها اياهن بأسلوب ادبي لهيك اكتر من قارئة عزاء طلبت منها تصوير المحاضرات وهيك كتار من اهل الضيعه انسجموا مع هالقصص وصارت متلها متل بقية قصص اهل البيت بالنسبه إلهن …طبعا من دون ما يعرفوا إنو هالقصص صاحبها سيدنا عمر الله يرضى عنو.
صدقا ما بعرف يومها ليش عملت هيك بس اللي استنتجتوا من اللي صار ..إنو نحن ناس كتير طيبين وممكن اي شي يأثر فينا بس ناقصنا إنو نتعرف عالأخر من زاوية تانيه غير اللي علمونا إياها …زاوية أمير المؤمنين …علي ..عمر ..ما بتفرق.

 

إقرأ أيضاً: الحريري: لا فرق بين السنة والشيعة

آخر تحديث: 20 سبتمبر، 2018 6:30 م

مقالات تهمك >>

ننصحكم >>