لازم ننتخب الأحزاب وخاصة تحالف الثنائي الشيعي لأن كل بلائنا من العدو الإسرائيلي….
طيب،
مين عمل الدين العام 85 مليار دولار؟ إسرائيل أو حكومات التشليح المتعاقبة؟
مين لوث مياه نهر الليطاني وسرطن مزروعاتنا وعم يقتلنا بشكل شمولي؟ إسرائيل أو الفاسدين المحميين من الأحزاب؟
مين عمل مطامر بالبحر وسمح بوجود 941 مكب زبالة ومغطي الزعران اللي عم تحرقها وتقتلنا بكل أنواع الغازات السامة؟ إسرائيل أو الأحزاب الحاكمة والمتحكمة فينا؟
مين صرف 22 مليار دولار عالكهرباء وبعدنا عم ندفع فاتورتين ولهلأ ما عنا معمل كهرباء غير الجية والزوق ودير عمار اللي دخانهم عم يفتك بروايانا كلنا؟ إسرائيل أو سلطة الفساد؟
طيب مين مانع انشاء السدود وتارك غالبية الشعب عطشان والمي داشرة عالبحر؟ إسرائيل أو تقاسم الصفقات بين الترويكا؟
يا خيي سؤال، اسرائيل مانعة الطبابة المجانية وضمان الشيخوخة والتعليم المجاني؟ اسرائيل فرضت ضرايب علينا وعملت 11% TVA؟
في شي مرة موكب لزعيم اسرائيلي صهيوني كان اكتر من سيارتين او حبسوا الناس بسياراتهم كرمال يمر هالزعيم؟
بدكن كفي؟
هيدا الفساد اسبابه أنتم يا اصحاب السلطة، جميعكم، بعضكم فاعلون، وآخرون مشاركون، حتى الساكتون عن الفساد شركاء…
لا سامحكم الله… لن ننتخب من قتلنا ودمر اقتصادنا وهجرنا.
