يا شعب لبنان العظيم.. يا تبع الزعيم!

كوستابرافا
هو المفروض المواطن يقوم من النوم ويصحصح شوي ليسمع الأخبار الحلوة، خصوصي إنو بيشتغل شغلتين ليعيش.

هيدي الخصوصي غير النمرة الخصوصي الي لازم يدفع 50 الف حتى يغيرها.

فيا عموم الشعب يلي عم تركبوا العمومي لان ما معكن حق بنزين للسيارة..اسمعوا وعوا..عو عو عوووووو!

جاي النفط جاي..جاي اليوم الي رح تشموا النفط ببحره وبره..رح تشمو بدون ما تدوقوه.

لهيك خلينا نوقف نق عالسلطة وننسى خلافاتنا ونوقف حد بعض متل وقفتكم بالنافعة من كم يوم لأن البلد بالف خير!

صدقوا الوضع بعدو بيحمل.. والمواطن لازم يوسع صدرو..متل ما عم يوسعوا مكب الكوستا برافا.. وبرافو لكل شخص قاعد عم يعد كل بحصة عم تنزل بالمكب.. هيدي البحصة غير بحصة الشيخ سعد.

وكمان ما تنسوا إنو الانتخابات يلي حتصير بأجواء ديموقراطية صارت ع البواب..

اقرا أيضاً: لا نعيش في جزر منعزلة…

واكبر دليل على ديموقراطيتها انو لحد هلّأ ما في شي محسوم. يعني الصوت بعدو ما تحدد سعرو..والصوت عند الشعب، والشعب عند الحاكم..والحاكم بمون..

هلئ شيلونا من المزح الانتخابات قربت. يعني صار وقت حساب ما في ملامة وعتب..كل واحد فينا يوم الانتخابات لازم يحط إيدو على صندوق الاعاشة ويحاسب زعيمه على بون البنزين.

لأن زعيمك لِبتعرفو احسن من يلي بتجهلو..وفقدانك صعب أكيد… ما المتل قال: ما بتعرف قيمتو الا لما بتجرب قيمتو المضافة.

السابق
رياض عوض ينثر «كلمات ذات مفعول رجعي»
التالي
أقلّيّات… لكنّها لا تتحالف!