في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى إزالة يافطات الاحتفال بذكرى المولد النبوي من مدينة طرابلس.
إقرأ أيضاً: «عقصة» لـ «الإعلام»: ممكن تعملوا السبعة ودمتها .. تحت إسم «السكوب»!!
وجاء في نص الحلقة:
بغض النظر إذا أنا بحتفل بالمولد أو ما بحتفل فيه .. بس أنه والله كبيرة كتير .. رئيس بلدية يطلع قرار بإزالة لافتات الاحتفال بالمولد .. وقبل المناسبة بيوم
ما شاء الله عنه وعن قراراته .. لما تكون يافطات لتمجيد الزعيم الفلاني أو المسؤول العلاني .. بتضل وكسر عن راس أكبر مسؤول
لما صورة الزعيم ترتفع على المخالفات أو فوق البسطات المحتلة أرصفة وأماكن عامة .. هيدي ما حدا بيسترجي يقرب صوبها
رئيس البلدية بيرفع مسؤوليته وبيرميها على رئيس دائرة النظافة .. رئيس دائرة النظافة بيقول أنه هو نفذ تعليمات الرئيس .. بيجيك حدا بيقلك هيدي مسؤولية المحافظ ياللي نفى هالأمر .. وهو اللي أمر بالازالة
وتعا فتش دور .. بتطلع أنه شركة لافاجيت هي الي شالتهن بتوجيهات شفوية من رئيس البلدية عبر رئيس دائرة النظافة .. يعني الكل خابصينها سوا
كنت بتمنى من رئيس دائرة النظافة يمتنع عن تنفيذ هالأوامر وحتى لو تعاقب كرمالها .. لأنه أكيد .. شرف إله إذا بيتعاقب أو بينطال كرمال هيك موضع .. وساعتها .. بيكون هو ارتقى واللي أعطى هالأمر خاب وخسر وتبهدل
لأنه هاد أمر ذل وتفاهة .. أنه تنشال هيدي اليافطات .. ونفس البلدية عم تحضر للاحتفال بأعياد شركائنا بالوطن يالي جاية بعد فترة قصيرة .. وساعتها رح يتسابقوا مين بده يوقف حد الشجرة ويتصور .. ومين رح يركّب أكبر شجرة
والبلدية هي هي .. رح تشاركهن كرمال العيش المشترك .. إيه بس معليش .. العيش المشترك يا بلديتنا .. يكون إلنا وإلهن .. فيا ريت تعاملي اللي إلنا .. على الأقل متل ما بتعاملي اللي إلهن !!
