عزيزي اللبناني لا تنسى الـ100$!

يقبض اللبناني من الزعيم 100 بدل انتخابه لأربع سنوات قادمة.. فماذا يأخذ الزعيم منه بالمقابل؟

عوافي…
حضروا حالكم من هون لسنة في إنتخابات، يعني جايي الـ100$…
بس إنتبهوا هاي الـ100$ مفعولها رح يكون ل55 سنين، إذا صدقت السلطة وعملت إنتخابات بوقتها، وإذا المجلس الجديد ما فكر يمدد لحالو بعد 4 سنين كمان (متل ما بتعرفوا، كل شي وارد).

إقرأ ايضا: المشنوق: لا انتخابات نيابية

طيب، يعني يا جماعة، هاي الـ100$ تبعكم رح تكون استثمار كتير ناجح لأهل السلطة، وهلق رح منشوف سوا كيف:

1- أول شي الـ100$ رح نقسمها على 5 سنين، ومن بعدها رح نقسمها على 12 شهر من كل سنة، ورح نشوف الـ100$ قديش قيمتها كل يوم من أيام الـ5 سنين يلي جايين: 100÷5÷12=1.67$ يعني باللبناني: 1.67*1500= 2500 ل.ل. هولي بالشهر. بعني يا أخونا العزيز يلي عم تقبض من الزعيم ومبسوط عم تهيصلو حقك بالشهر 2500 ل.ل. يعني الزعيم السياسي عم يشتريك كل يوم بسعر: 2500÷30=84ل.ل. باليوم.

يعني بالعربي المشبرح، ومن دون كذب، ما حقك نِغلة…

2- طيب، خلينا نقول إنو الدين العام 100 مليار دولار… بس 100 مليار دولار، وخلونا نقسمهم على 4 مليون لبناني، يعني: 100،000،000،000$ ÷ 4،000،000 = 25،000$. هاي ال25،000$ هي دين على كل بني آدم عندو إخراج قيد…

3- خلونا نفترض إنو هيدا الدين عمرو 30 سنة، يعني: 25،000÷30÷12÷30 = 2.31$ باليوم = 2.31$ * 1500 = 3،472 ل.ل. باليوم.

4- طبعًا كلنا منعرف هيدي الديون وينيه… مش عم نكشف سر إنهم سارقين البلد… هني بيتهموا بعضهم… يعني الزعيم، الله يطول بعمرو، من 30 سنة لليوم بيسرق من كل لبناني شهم 3،472 ل.ل. وبردلو منهم 84 ل.ل لزوم الإنتخابات…
يعني بسرقونا ب 41 مرّة أكتر ما بيعطونا… (3،472 ÷ 84 =41.3)

هلق يعدكم مصدقين إنو اللبناني ذكي؟؟؟ عزبزي اللبناني لا تنسى الـ100$!!!!

آخر تحديث: 16 يونيو، 2017 2:14 م

مقالات ذات صلة >>

ننصحكم >>