مواطن لبناني… ربى جحش شي 15 سنة… لصار حمار …
يوم من الإيام … فاق الصبح … لاقاه ميت
اتصل بالطبيب البيطري … من شان يعرف … سبب الوفاة…
فحص الطبيب الحمار… وقلّــوه للمواطن …: حمارك فـَـقــَـعْ بسبب جَلطة…
تفاجأ المواطن…!!! … وشعر بحالة صدمة … وذُهول…
غرغروا عيونو بالدمع …
إحتضن المواطن رأس حماره الميت… وراحَ ينوح … ويرثي الحمار … بحرقة وصدمة واستغراب:
ليش يا عيوني… ليش …
ليش إجتَك الجلطة؟!!! قلّــي …
قـَـــصَّرت معك بالتبن والعَلَف …؟!!!
خريج هندسة… وقاعد بالبيت ومش ملاقي شِغل؟!!!
أو خريج أدب إنكليزي … وفاتح محل خضرة؟!!!
أو خريج أدب عربي… وعم تشتغل عالتاكسي …؟!!!
أو خاطِب… وزعلان مع أهل خطيبتك … وكثر حكي الناس …؟!!؟
أو صرلك 15 سنة عم تشتغل … وهلق كل اللي جمعته … حطيتوه على إبنك ليسافر يدرس برّا؟!!!
ليش… الجلطة… ليش … دخيلك فيق … وقلّي…
إنو مديون… وما عم توفي ديونك؟؟!!!
أو آخذ قرض… من البنك … والبنك لاحقك من ميل لميل …؟!!!
مجوز… ومـَّـــرمـَـط … ساعة نايم عند بيت أهلك .. ساعة نايم عند بيت أهلها للمرا …؟!!!
إنو حَدَن وقفك عالطريق… هدَّدَك بالسلاح … وشلحك السيارة ..؟!!!
مش ملاقي بيت يا حَزَني..؟!!!
أو أقساط المدارس… لاعنة سَماك ..؟!!!!
عم تهدُس بالوضع … ؟!! إنو الوضع فلتان … والزعران بكل الشوارع …؟؟!!!
أو إنو عايشين بمزرعة… وسلاح فايت … وسلاح ظاهر … ؟!!! … وتراخيص … ومحسوبيات … ومافيا؟!!!
أو فتت على شي دائرة حكومية… وقضيت النهار … ودفعت 1000 رشوة … لحتى خلصت المعاملة آخر النهار …؟!!!
أو رحت يا مشحَّـــر على المستشفى… ووقفوك عالباب … لتدفع مصاري…؟!!!
بدّي إفهم …. إجــِـــتــَــكْ الجلطة ليش… ؟!!!
إنو طلعت تقاعُـــد… والمعاش مش عم بيكفيك …؟!!!
أو إجاك فشل كلوي… أو انصبت بالسرطان من ورا المي الملوثة اللي عم تشربها … والأكل اللي فيه براز بشري..؟!!!
أو من اللحم الفاسد…؟؟؟!!!
إنو مشتهي السَمَك… والسَمَك… مش مين ما كان في يشتريه…؟!!!
أو رحت عالفرن… ونطرت بالصف شي 5 ساعات… وما طلعلك ربطة خبز..؟!!!
أو لتكون… مارقة عليك حرب أهلية… وإجتياح… وألف مرة زامط من السيارات المفخخة…؟!!!
الأحزاب عم بيبيعوك المجلة غصب عنك…؟!!!
أو زعران السياسة.. عم يستغلوك… من شان الإنتخابات…؟!!! وبعدين بيرموك عالزبالة.. ؟!!!
يا روحي… عم بتشم روايح الزبالة المنتشرة بالطرقات. . .؟؟؟!!!
أو عم تسمع تصاريح وزير الخارجية.. ؟!!!
أو مزعوج لأن مرق موسم العوجة والجنارك… وأنت بعدك ما سمعت فيهن..؟!!!
ليش إجتَك الجلطة؟!!! قلّــي…
ليش لتموت… بوقت صار عنا رئيس… والعهد قوي…؟!!!
ليش لتموت… ونحنا … غرقانين لشوشتنا بالإنتصارات …؟!!!
ليش لتموت… قبل ما يقروا قانون سن الشيخوخة والضمان الإجتماعي…؟!!!
يا حَـــزَني عليك…
روح… حرقتني… جرحت حسّ المواطنة… المزروع فيي…
روح… خليتني حِس… مثل كأني… كأني
روح الله يسامحك…
