علّق الممثل الكوميدي نعيم حلاوي بتدوينة فيسبوكية على الظروف التي يعايشها المواطن اللبناني في ظل الاعتصامات وقطع الطرقات وأخرها اعتصام أصحاب الشاحنات، ودوّن حلاوي على صفحته فيسبوك:
الإنسان “مخيَّر” أجلّكم لدرجة انو متل اليوم مثلاً بيكون هالإنسان “مقرر” يكون بشغلو بوقت معيّن وإذ بيلاقي حالو فجأةً علقان هو وسيارتو ب نص الأوتوستراد والسير واقف كليّاً ومُحاط ببحر من السيارات من كل الإتجاهات وكل هالشي لأن أصحاب الكميونات “قرروا” انو يعَورضوا كميوناتن الملوّنة ب نص الأوتوستراد ويسكّروه من الوريد للوريد
فيا أصحاب قصة انو الإنسان “مخيّر” ساعدوا صاحبنا لو كنتوا محلو شو كنتوا اخترتوا؟
–
-انو تطرقوا غطة بالسيارة؟
-تكتبوا ستاتس بهالحجم؟
-تتشمسوا ع سقفا؟
-تتمشوا حواليها؟
-تقفلوها وتتركوها بأرضا وتروحوا مَشي؟
-تطلبوا هليكوبتر تسحبكُن؟
–
تفضلوا “اختاروا” بأيا طريقة ممكن تكونوا بالشغل بالتوقيت اللي لازم تكونوا فيه.. ما انتوا “مخيّرين” لأ؟ ..أنا بقول رح تختاروا انو “تنطروا” لما “أصحاب الكميونات” هني اللي “يختاروا” عنكن أيا ساعة “بيقرروا” يفتحوا الطريق
انشالله تتحقق مطالبهم المحقة بأقرب وقت تا ما بقى يقرروا عنا مسار حياتنا ومصير توقيتنا
وتوصلوا بالسلامة
إقرأ أيضاً: نعيم حلاوي: الله يسترك يا شيخ سعد
