في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى الحملة الأخيرة التي أطلقها حزب الله لتجهيز المجاهد، وجاء في نص الحلقة:
لله يا محسنين لله .. حسنة قليلة .. بتجهز مجاهدين كتيرة .. قرب يا عمي قرب .. شارك معنا بحملة تجهيز مجاهد .. في عنا موديلين .. في جاهد وفي مجاهد
ساعدينا يا أختي .. ساعدنا يا أخي .. بدل العدو صار عنا أعداء كتير .. وبدل الجبهة .. صار عنا جبهات .. قرب وساهم معنا يا متبرع . ساهم في تجهيز مجاهد
كل مجاهد بجبهات العز والكرامة .. محتاج يا أخي .. إيه والله محتاج .. محتاج بده شوية تجهيزات .. تياب .. وعتاد وكلساتات وبيجامات وبرادات وغسالات وآيبادات وحرامات وشراشف وملاحف
قاوم .. يرحم أهلك .. قاوم .. يستر على حريماتك .. قاوم .. يرحم البطن اللي حملك .. إذا مش بجسدك .. قاوم بمالك لو أخي .. حركولنا الحالة شوي .. لحلحولنا ياها
يا أخي إذا ما بدك تتصدق .. فيك تدفعها من الحقوق الشرعية .. زكاة كفارة يمين فدوة صيام بدل حج بدل ضائع خمس سدس تمن .. أي شي .. المهم ادفع
هيدا المشروع يا جماعة الخير .. هو مشاركة مشرفة .. لكل حدا حابب يآوم .. فيك تدفع كاش .. فيك تدفع شيكات .. فيك تدفع تقسيط .. فيك تدفع برهن وفيك بلا رهن .. المهم ادفع
مصاريفنا زادت .. وأسر الأسرى والشهداء عم تكبر وتكتر يوم بعد يوم .. ما عم نلحق مصاريف .. للتبرع أو المساهمة أو المشاركة .. زيرو تلات سبعات خمس آلاف .. ومع كل تبرع .. بيطلعلك طقم سيراميك هدية
تبرع .. أحسن ما كأس الهزيمة نتجرع .. ساهم معنا .. واعتبر نشرك لهذه الحلقة .. هو دعم للمقاومة بحد ذاته .. تبرع بالمبلغ اللي بدك ياه .. بس رجاءً لا تنسى لما بدك تتبرع .. تتبرع بمبلغ زائد مصاريف الشحن !!
#بلال_مواس
#عقصة_دبور
اقرأ أيضاً : تقشّف ودعوة للتبرعات: هل أفلست الحرب السورية حزب الله ؟
[youtube https://www.youtube.com/watch?v=AjnGX1zIcTA]
