في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى إطلالة حسن نصرالله الأخيرة وتوقيع كتاب القرآن.
إقرأ أيضاً: عقصة لـ«الجديد»: فينا نقول الكوميديا الخياطية؟ مدير القناة قواداً؟ ما عم تنزعج أبداً؟
في ناس بتوقّع كتب من كتابتها .. في ناس بتوقّع روايات من تأليفها .. ممكن يوقعوا سيدي .. ممكن يوقعوا ديفيدي .. ممكن التوقيع يكون على سند .. على شيك .. ممكن يكون التوقيع عند كاتب عدل على اتفاق أو عقد .. ممكن نوقّع على أوراق علامات أولادنا .. ممكن الحكيم أو الدكتور يوقّع على كشفية مريض أو طلب تحاليل أو صور شعاعية .. ممكن التوقيع يكون على عريضة ضمن حملة كبيرة .. ممكن يكون على جدول الرواتب آخر الشهر .. ممكن يكون على معاملة رسمية بالموافقة أو عدم الموافقة.
ممكن حتى التوقيع يكون على الجفصين إذا حدا منعرفه إيده أو رجله مكسورة .. ممكن نوقّع على ظبط مخالفة كهربا أو سيارات .. ممكن رئيس الجمهورية يوقع على قرارات حكومية وزرائية موقع عليها رئيس الحكومة بعد ما الوزير المختص وقع هالقرارات .. حتى أنا .. ممكن بوكرا يجبروني وقّع على تعهد إني ما أعقص حدا .. وأكتفي بالتحدث عن ثقب الأوزون.
بس في توقيع جديد .. ظهر فجأة على الساحة .. توقيع غير شكل .. مميز .. عميق .. إيه إيه .. التوقيع على القرآن .. على المصحف يعني .. إيه والله .. عم تتخيلوا ؟؟ يعني اللي عمل حزب بإسم الإله .. ورجع روّج لفكرة أنه انتصاراته من عند الاله .. وين هيلاقي مشكلة أنه يوقّع هو على كتاب الاله ؟؟بس ياللي ما فهمته .. شو يعني وقّع على القرآن ؟؟ وشو بتفرق النسخة الموقعة منه عن الغير موقعة؟؟ أنه مثلا هيداك صار أغلى وأهم ؟؟ ليش القرآن ناقصه قيمة ليجي مين يرفعله ياها ؟؟
القرآن محفوظ ليوم الدين .. محفوظ من استعمال السحرة والمشعوذين .. محفوظ من الاساءة والتحريف .. وأكيد .. رح يكون محفوظ من توقيع مخلوط بالدم السوري !!
#بلال_مواس
#عقصة_دبور
