في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى ما قيل عن الجيش الغريب الذي احتل لبنان وقصف القصر الجمهوري.
إقرأ أيضاً: عقصة لـ«حماة الديار»: خليني أستغل الوضع وأعمل فرقة جديدة سميها طلائع البعث
وجاء في الحلقة:
“يا شعب لبنان العظيييييييييم،
في جيش غريب مش معروف مجهول المصدر الله أعلم مين هو، ما منعرف قرعة أبوه من وين، جيش خير اللهم اجعله خير، أول مرة منشوفه .. ما لحقنا نعرف هو من وين ، شو أصله؟ وشو فصله ؟؟
من وين إجا قبل ال80 ووين راح بعد ال80 .. جيش ضرب صواريخ وقذائف عالقصر الجمهوري .. بس كل شي حاولنا نعرف مين هو ؟ ما قدرنا، حاولنا كتير .. صرنا ندأدس نتحرى نبرم .. ما وصلنا لشي
مع أنه أحياناً كنا نلتقى عالحواجز .. نشوف عساكر هالجيش ما يقرقعوا متة .. بس ما كان دليل كافي لنحدد هالجيش من وين ..
عطينا حالنا فرصة أكبر، سمعنا واحد منهم ما يقول .. قرّب لهون ولا .. فقمنا قربنا لنعرف مين هالجيش ما كنا نعرف .. شكينا إيه .. بس ما فينا نجزم ..
مرة من المرات، بيصرخ وبيقول .. نزل البلور ولا .. كمان زادت الشكوك عنا .. بس لساتنا بمرحلة الظن .. وكلكن بتعرفوا .. إن بعض الظن إثم .. ما فينا نجزم يا جماعة الخير ما فينا نجزم ..
جيش غريب .. وما غريب إلا الشيطان .. عم يسرح ويمرح ببلادي .. مين هو يا ترى مين ؟؟ مين ؟؟
نحن شكينا .. إيه ما بنكر .. قلنا معقولة يكونوا نمور التاميل تاعون سيريلانكا؟؟ بس لا .. بسيريلانكا ما بيقولوا ولا .. طيب معقولة الجيش الأحمر الروسي؟؟ بس بستبعد .. لأنه الروس .. ما بيقولوا بلور ..
خلاص .. بما أنه ما عرفنا مين .. أنا بقول .. تحفظ القضية وتسجّل ضد مجهووووول !!
#بلال_مواس
#عقصة_دبور”
