حدن عندو «طاسة الرّعبة»

يا حرام..!
حضرات الوزراء الميامين “تفاجأوا” بأنو نهر الليطاني العظيم ملوّث..!!
عن جد شي بيشفّق القلب..!
ما كان معن خبر..
مش إنّو أصحاب المصانع يللي بتكب سمومها بالنهر وأصحاب المرامل يللي بترمي رواسبها فيه.. وأصحاب البقرات النافقة المريضة المرمية بقلبو .. وأصحاب المطاعم يللي مزنّرة على جوانب هالنهر المعتّر .. وجماعات البلديات يللي بتزتّ الزبالة وبتدير المجارير على مجراه…مش إنو كل هالمنظومة الملوّتة هني زلم الوزراء والنواب والزعماء و”الإكيپ” السياسي المعفّن…
يا حرام … نقزوا.. تفاجأوا .. دب “الرعب” بين إجريهن… يللي ما عندن شعر.. وقف شعر روسهن… ويللي عندن شعر.. نتفوه من “القهر”…
يا متذاكيين على “جماهيركن الغفورة”… شمّيتوا ريحة ال ٨٨٠ مليون دولار يللي اقتُرِحَتْ لتنظيف النهر وحبيتوا “تغمّسوا” صبيعكن وتلحسوها…؟
ولك من نحنا وصغار منعرف إنو جماعاتكن هني يللي موسّخين النهر ومزبّلينو وحارقين سلّافو … شو عدا ما بدا حتى “تفاجأتوا” و”دبّت” النخوة ب”ضمائركن” وانتفضتوا وارتعشتوا ..؟
على مين لعب “الكلا كلا” يا “شذاذ الآفاق..”..؟
ما بعتقد إنكن بحاجة ل”طاسة الرعبة”… ما إنتو راعبين الأحياء والأموات… حتى زبالة النهر مرعوبة منكن….!!!
والسلام….!!

السابق
حزب الله نعى عنصرين سقطا في الـ 24 ساعة الماضية
التالي
بالفيديو: بعدما هجّرها من أهاليها.. الأسد يصلّي العيد في داريا