في البرنامج الإذاعي “عقصة دبور” الذي يقدمه الناقد الكوميدي بلال مواس عبر إذاعة الفجر، تمّ التطرق إلى موضوع التفجيرات التي استهدفت الحرم النبوي، وجاء في موضوع الحلقة:
“وليه من كل عقلك ؟؟ أنو من كل عقلك أنت ؟؟ ولا بقلك ؟؟ أكيد ما عندك عقل، لأنه لو عندك ذرة من العقل، ما بتعمل عملتك !!
بالمدينة يا ظالم ؟؟ بطيبة يا مجرم ؟؟ شو قالولك ؟؟ إيه ؟؟ بشو وعدوك ؟؟ كيف قنعوك ؟؟ ولك شيلني من كل التفجيرات بالعالم .. بس هيدا التفجير بالذات .. كيف غسلولك دماغك ؟؟ أو بالأحرى كيف قدروا لغيولك ياه لهالدماغ إن وجد ؟؟ قوم فجر حالك بمدينة النبي ؟؟ وزوار النبي؟؟ وأحباب النبي ؟؟ وضيوف النبي ؟؟ حتى تطلع تتعشى أو تفطر مع النبي ؟؟ ولك إيه أنا عم أكتبها كتابة .. ومش ظابطة .. ولك أنت كيف ظبطت معك ؟؟ ولك برمضان ؟؟ وبالعشر الأخير ؟؟ وبمدينة النبي صلى الله عليه وآله وسلم؟؟ ومقتنع أنك عم تقدم نفسك في سبيل الله ؟؟ أنو مش في سبيل أي شي تاني ؟؟ يعني بس سؤال .. قبل ما تكبس زر التفجير .. هيك غمضت عيونك .. وأشهدت ؟؟ قلت أشهد أن لا إله إلا الله .. وأن محمداً اللي بدي فجّر حالي بمدينته وأهتك حرمة مدينته وأدخل تحت لعنة حديثه .. رسول الله ؟؟ ولك إيه ما عم تركب معي .. والله مش عم تركب .. لا بالطول ولا بالعرض .. عم حاول هيك .. هيك .. مش عم تركب أبداً .. أنت كيف ركبت معك ؟؟ والله العظيم كان أقربلك النبي ما أنك تلف هاللفة كلها .. ركعتين بالروضة الشريفة مع دمعتين صادقين .. ومر سلّم عليه صلى الله عليه وسلم .. والله كان أقربلك وأسهل إلك .. وعلى فكرة .. حتى بالروضة الشريفة أو عند الحجر الأسود .. في تحريم بمزاحمة المسلمين .. يعني حرام تدفش وتنكوع إخوانك شوي، لمجرد أنك توصل للروضة أو للحجر الأسود … فكيف أنك تفجرهن ؟؟؟؟ كييييييف ؟؟؟؟
#عقصة_دبور”
