صرخة أطلقها موظف المستقبل محمد زين عقل عبر صفحته فيسبوك وتضمنت:
“اليوم , و بمناسبة انو اول يوم بشهر رمضان المبارك , فكرت أكتب شي , عن إنو كيف ب شغلي ( بالمستقبل) مش عم نقبض رواتبنا صرلنا فتره طويله ( الازمه صار عمرها سنه تقريبا او اكتر) و انو كيف البنوك ( بما فيهن بنك البحر المتوسط) عم يتكالبوا علينا بدهن يحصلوا منا القروض تبعهن (اللي سلّفنونا ياها أصلا بضمانة رواتبنا اللي ما عم نقبضها ) لا وهددونا إنهن رح يبعتوا اسامينا ( بلاك ليست )… عالبنك المركزي ….
كان عبالي أكتب بمناسبة انو اليوم بدأ الصيام عن زميل لالنا ( خضر) حمّلوه عالطوارئ بعد ما ابلغوه من البنك بانو لازم يترك بيتو فورا ( عطيوه 15 يوم انذار ت يخلي البيت) لان مش عم يدفع السندات المستحق عليه للاسكان …
كان عبالي احكي عن زميلة النا ( غيدا) عارضه عفش بيتها للبيع منشان عيلتها تقطّع هالشهر الفضيل …
كان عبالي إحكي عن صديق و زميل الي بالشغل ( وسام) , وأوصف قديش بيوجع ، لما زلمه مترين ب متر بتنزل دمعتو قدامك هوي وعم يحكي عن بنتو الزغيره وانو حلمها تاكل هي وبيّها قطعتين بيتزا بمطعم وهو مش قادر ياخدها لانو مش عم يقبض …
كان عبالي احكي عن أكتر من زميل ( كتار ) , أبلغوهن بالمدارس ( مدارس الحريري ضمنا ) انهن ما رح يقبلوا يسجلوا ولادهن للسنه القادمه بحجة انهن مش دافعين السنه الحاليه …
كان عبالي قول اني عرضت بيتي للبيع (لأني مضطر ) كرمال ابني يقدر يكمل علمو ب كندا .
كان عبالي احكي عن قصص كتيره و زملا كتار …
كان عبالي ( ويمكن واجبي احكي ) و إغضب عني و عنهن و فش خلقي و خلقهن ….
بس رجعت قلت لحالي …. روق …. روق …. خلص روق .
يمكن , لازم روق …. اي
لازم روق أولا كرمال صحتي
و لازم روق تانيا لأني بحب الرواق
و لازم روق أخيرا كرمال ( بالمستقبل ) ما يفهموني غلط , ويفتكروا اني عم بحكي ( بالعاطل ) عن التلفزيون , او يفهموها اني عم بنشر غسيل (مش نضيف ) ع هالحيط ……
و , كرمال اخر سبب بالتحديد … رجعت راجعت حالي , واخدت قرار صارم :
اليوم , ما رح إكتب ولا حرف … بلاها …. رح امحي كل اللي كتبتو….
رمضان كريم …. وينعاد علينا وعليكن ب أحسن انشاالله.”
