وعن الأم لما الشعر بيحكي…

ل بيكون قلبو كبير ما بيزغر
بيضل بعين الدني يكبر
الانسان مش لولو ولا مرجان
ولا حجر ماس وبهورة ومظهر
الانسان حس وعاطفة وتحنان
مش برهجي بخاتم ذهب اصفر
امي اللي كانت مملكة ايمان
عليها تحج التضحية وتعمر
الدمعة بعينا صفوة الوجدان
بتنزل على المظلوم ومعتر


برغم جور الدهر رالازمان
بقيت تكد تجاهد وتسهر
وتا يضل بيتا معزز ومنصان
من بعد ما الزوج الٌدني دشر
لمت حطب والشوك والعيدان
وتسلق القمح وعا الذرة تفطر
تنزل الحقل تقشقش البلان
وعا الصاج تخبز خبز المقمر
تحدل السطح تطين الحيطان
من قبل ما فصل الشتي يحضر
المنديل ل منسل من الخيطان
مرافق حياتا كان ومصبر
اغنى من الالماس والتيجان
واجمل من الياقوت والجوهر
بحيثو عا راسا وقت لما كان
يشرب من جبينا عرق اطهر
من نهر جاري من قصر مليان
لولو وعقيق وكورية ومرمر


ونمليتك وسراجك العتبان
يلي انهمل عا الرف وتغبر
بيسوى تريا بعالم الحيتان
بزيت الكرامة شعشع ونور
والمسبحة الاوفى من الانسان
انقطع خيطا وحبها تبعثر
ياما بايدك سبحو الرحمان
سبحان الله القادر الاكبز
وقبقابك ل مع جلدتو عطشان
من العطش ذاب وطق وتكسر
القمطة القميص الصحن والفنجان
وحتى ابريق الشاي المشحبر
الحورا العريشي الدرج والخزان
ومدقة السماق بالزعتر
الضمير وانت الحق والوجدان
من يوم يا امي ما دشرتو الدني
ها الدني بتزعو ونحن عم نزعر

آخر تحديث: 21 مارس، 2016 11:02 ص

مقالات تهمك >>

ننصحكم >>