يحيا العدل…يلي طلعت ريحتو!!

باللهجة العامية…

لما نزلوا التجمعات والحركات الشبابية والطلابية وعدة فئات من المجتمعات الشعبية اللبنانية ضمن حراك مدني تحت عنوان “طلعت ريحتكم” لحتى يطالبوا بأبسط حقوقن وحقوق اللبنانيين من شؤون اجتماعية وبيئية وصحية ومعيشية، واقامة العدل والمساواة والحقوق المدنية، أكلوا أتل وتبهدلوا ودعوسوهن قوات الأمن، واعتئلوا ناس كتير عالمحكمة العسكرية بتهم عديدة، منها تعكير صفو الأمن في لبنان، والبلبلة الطائفية بين اللبنانيين.
أما ميشال سماحة يلي كان عم بحضر لعمل إجرامي كبير وضخم لشمال لبنان لدرجة انو بيهتز فيه الامن اللبناني وبيحدث بلبلة مذهبية ما حداً بيعرف لوين بتودي إلا رب العالمين، ضهر من الحبس بأمر من المحكمة العسكرية اللبنانية وعلى صدرُ وسام الوطنية.

إقرأ أيضاً: إنسوا ميشال سماحة وأنطوان لحد… وعودوا الى أعمالكم يا شعب لبنان «العظيم»..
عنجد الشعب اللبناني شو عينو ضيئة، وما عندو رحابة صدر، كرامة اخلاء سبيل الوزير السابق عميل الممانعة ميشال سماحة صرعتوا الدنيا، لأ هاك عيب عليكم ما معكن حق. طيب انتو يا هاللبنانية ليش حاملين هالسلم بالعرض، خلص شو بأسر يعني، شو وئفت عليه لأبو “الميش” يعني، والله العظيم يا لبنانية انتو صايرين بضّحكوا، مش أول مجرم ولا آخر مجرم بفوت عالحبس وبيطلع بطل عنا بلبنان، ولاو شو نسيتوا أصت العميد العميل زلمة الجنرال ميشال عون اللزم فايز كرم، كيف فات عالسجن متلبس بالعمالة خلال تخابرُ مع العدو الإسرائيلي بحرب تموز، ومن بعدها بسنة ضهر من السجن برتبة بطل مغوار محمولا ً على الأكتاف.
عنجد يا لبنانية، بضلكن تنئوا كتير، انو هلأ يعني وئفت الئصة على أبو “الميش”، شو نسيتوه لهيدا المقاوم تبع الحزب يلي رسيّت عليه التكليف الشرعي ليعترف انو هوي يلي أطلق النار على الهليكوبتر تبعت الجيش اللبناني ونزلها عالأرض، واعترف الزلمة بعدين انو هوي يلي قتل قائدها الضابط سامر حنّا، ومن بعدها حبستوا الدولة شي سنة وأفرجت عنو من بعدها المحكمة العسكرية.

إقرأ أيضاً: في لبنان فقط…
مش حرام عليكن يا لبنانية تتهموا لميشال سماحة زور وأنو هوي مجرم وكان بدو يحط متفجرات وعبوات ناسفة بين الاحياء السكنية، مين يلي ألكن هالخبرية، ابداً مش صحيح، لأن لمعلوماتكم الفيديو المصور صوت وصورة لميشال سماحة هوي وعم بجهز المتفجرات كان عم بحضر لبرنامج تلفزيوني إسمو “الكاميرا الخفية” لينعرض بعدين على محطات تلفزيون الممانعة وفهمكم كفاية، حسنو الظن تاني مرة.
بعدين تعوا لألكن يا لبنانية، ليش مش معاجبكم حكي نائب محمد رعد تبع المقاومة، وعم تنتئدو اعتراضو لأنو قال عن المعترضين على إطلاق سراح ميشال سماحة بأنن جماعة “نكدية وكيديين واستنسابية”، طيب الزلمة يا جماعة هوي حر، وبدو يحكي يلي بدو ياه وما حداً إلو معو شي، لأن بنظرو لسعادة النائب رعد يلي بحضر متفجرات وعبوات ناسفة ليفجرها بالمناطق والاحياء السكنية وبين الناس، هو عمل مقاوم وبطولي وشجاعة، وهاك يا لبنانية ويا أهل الضاحية، بكون حضرة النائب محمد رعد أعطى حق كل المجرمين التكفيريين يلي قاموا باعمال تفجيرات انتحارية بألب الأحياء السكنية للضاحية وآخرهن تبعت برج البراجنة يلي كتير بتشبه أصة متفجرات وعبوات الناسفة لميشال سماحة، مش هاك يا سعادة النائب المقاوم محمد رعد المحترم.

إقرأ أيضاً: إطلاق ميشال سماحة: قادة 14 آذار هم المسؤولون
بعدين انا كمان عتبي على المحكمة العسكرية والدولة، انو ولو استكترتوا عليه للريس ميشال سماحة من بعد ما افرجتو عنو ما تعلئولو على صدرُ وسام الأرز من رتبة فارس تقديراً لجهوده الوطنية، عنجد عيب عليكم، وممكن يكون ابو “الميش” زعل منكن، بس يلا ما بأسر مرة تانية بس يجهزلو شي عبوة تانية ساعتها بتعلأولو شي وسام.. .

إقرأ أيضاً: تصريح محمد رعد «أخطر» من تسريح سماحة
بس في إلي طلب زغير وتمني من القضاة العسكريين يلي اصدروا حكم اخلاء سبيل ابو”الميش”، وحيات شرفكم الوطني والعسكري والقانوني يلي طلعت ريحتن، مزال الئصة عندكن هاك هاك فلتانة، يا رت تفلتوا لشيخ أحمد الأسير بأقرب وئت مساواةً بأبو “الميش”، لان عيب بحئقن المهني ما بيسوا خصوصاً انكن لما عملتوا قضاة اقسمتوا اليمين وانتوا رافعين إيديكم، يبعتلا كسرا يا رب.
اخيراً مبروك ابو “الميش” على خروجك، برافو عليك يا قائد، إدرت تدعس على كل القوانين والاعراف والدساتير بلبنان، وتضهر اخلاء سبيل بأمر من قضاة عسكريين معوّدين على تلئي الأوامر “أمرك سيدي”، وبيمتازوا بمناقبية عالية من الشرف العسكري والوطني وكقضاة عسكريين داخل المحكمة العسكرية، ويحيا العدل.

السابق
في لبنان فقط…
التالي
عملية خطف في قب الياس وضحيتها «كويتي»!